2 Kings 10

Ukubulawa Kwabendlu ka-Ahabi

1ESamariya kwakulamadodana angamatshumi ayisikhombisa ayengawendlu ka-Ahabi. Ngakho uJehu waloba izincwadi elobela izikhulu zaseJezereli, abadala lakulabo ababesondla abantwana baka-Ahabi. Waloba kanje: 2“Masinyazana ekuboneni kwenu lincwadi, njengoba abantwana benkosi yenu besezandleni zenu njalo lilezinqola zokulwa lamabhiza, umuzi wenqaba lezikhali, 3khethani lowo elimbona efanele kulabo bonke phakathi kwamadodana enkosi yenu limfake esihlalweni sikayise sobukhosi, beselilwela indluyenkosi yenu.”

4Kodwa besaba bathi: “Nxa amakhosi amabili ehlulekile ukumelana laye, thina singakwenza njani?”

5Ngakho isiphathamandla sesigodlo, usibalukhulu, abadala kanye labalindi bathumela lelilizwi kuJehu, “Sizinceku zakho, njalo sizakwenza konke njengokutsho kwakho. Kakho esizamkhetha ukuba abe yinkosi; yenza lokho obona kulungile kakhulu.”

6Ngakho uJehu wabalobela incwadi yesibili esithi, “Nxa livumelana lami njalo lizimisele ukungilalela, qumani amakhanda amadodana enkosi yenu libe selibuya lawo kusasa eJezereli ngasonalesisikhathi.” Amakhosana esikhosini, ayengamatshumi ayisikhombisa, ayehlala lamadoda aqakathekileyo phakathi komuzi, okuyiwo ayesondla amadodana enkosi. 7Incwadi yathi ifika, amadoda la abulala wonke amakhosana angamatshumi ayisikhombisa. Afaka amakhanda awo ezitsheni awathumela kuJehu eJezereli. 8Isigijimi sithe sifika satshela uJehu sathi: “Sebewalethile amakhanda amakhosana.” UJehu wasekhupha ilizwi esithi, “Abutheleleni abe zinqwaba ezimbili esangweni lomuzi kuze kube sekuseni.”

9Ngosuku olulandelayo uJehu waphuma; wema phambi kwabantu wathi, “Lina kalilacala. Yimi engithame ukubulala inkosi yami njalo ngiyibulele, kodwa ngubani obulele bonke laba?

10Alibokwazi ukuthi akukho lalinye ilizwi elivela kuJehova lingxame u-Ahabi labendlu yakhe, elizakwehluleka. UNkulunkulu usekwenzile lokho akuthembisa ngenceku yakhe u-Elija.” 11Ngakho uJehu wabulala bonke eJezereli abendlu ka-Ahabi ababesele, kanye lezikhulu zakhe, abangane bakhe abasekhwapheni labaphristi bakhe, akusalanga muntu kwabendlu ka-Ahabi.

12UJehu waphuma njalo waqonda eSamariya. EBhethi-Ekhedi yaBelusi,

13wahlangana lezihlobo zika-Ahaziya inkosi yakoJuda wababuza wathi, “Lingobani lina na?” Bona bamphendula bathi, “Siyizihlobo zika-Ahaziya, njalo silande ukuzabona abomndlunkulu wenkosi kanye lendlovukazi engunina.”

14Yena wathi ezincekwini zakhe, “Bathatheni bephila!” Ngakho babathatha bephila bayababulalela emthonjeni weBhethi-Ekhedi – amatshumi amane amadoda. Kakho loyedwa abamtshiya ephila.

15Ngemva kokusuka kwakhe lapho, wahlangana loJehonadabi indodana ka-Rekhabi, owayesendleleni ezomhlangabeza. UJehu wambingelela wathi, “Wena uvumelana lami na, njengoba mina ngikanye lawe?” UJehonadabi waphendula wathi, “Mina ngilawe.” UJehu wathi, “Nxa kunjalo ngibamba isandla,” kwathi esembambile wamkhweza enqoleni yokulwa. 16UJehu wasesithi, “Woza sihambe ngiyekutshengisa ukuphitshekela kwami uJehova.” Ngakho wagada laye enqoleni yakhe yokulwa.

17UJehu uthe efika eSamariya, wabulala bonke ababesele khonale abendlu ka-Ahabi, wababhubhisa njengokutsho kwelizwi likaJehova ekhuluma ku-Elija.

Ukubulawa Kwabaphrofethi BakaBhali

18Ngakho uJehu wamema abantu bonke wabahlanganisa wasesithi kubo, “U-Ahabi ubekhonza uBhali kancinyane; uJehu uzamkhonza kakhulu. 19Ngakho memani bonke abaphrofethi bakaBhali, bonke abatshumayeli bakhe labaphristi bakhe. Linanzelele ukuthi kakho loyedwa ozasala, ngoba ngifuna ukwenza umhlatshelo omkhulu kuBhali. Ongayikubuya kasayikuphila.” UJehu wayebakhohlisa ngoba wayedinga ukubhubhisa abafundisi bakaBhali.

20UJehu wasesithi, “Bizani umhlangano wokudumisa uBhali.” Basebewumemezela.

21Wasethumela ilizwi kulo lonke elako-Israyeli, beza bonke abafundisi bakaBhali; kakho loyedwa ongezanga. Bagcwala baminyana ethempelini likaBhali kusukela emsamo kusiya emnyango. 22UJehu wasesithi kulowo owayegcina izigqoko zabakhonza uBhali, “Balethele izigqoko bonke abakhonza uBhali.” Ngakho wabalethela lezozigqoko.

23UJehu loJehonadabi indodana kaRekhabi bangena ethempelini likaBhali. UJehu wathi kubafundisi bakaBhali, “Linanzelele kungangeni loyedwa oyinceku kaNkulunkulu enkonzweni yenu, akube ngabakhonzi bakaBhali kuphela.”

24Ngakho bangena banikela benza lemihlatshelo yokutshiswa. UJehu wayelindise amadoda angamatshumi afica mibili wawaqonqosela wathi, “Loba ngubani ozayekela omunye walamadoda engiwabeke ezandleni zenu ephunyuka, ngizaphindisela ngempilo yakhe.”

25UJehu wathi eseqedile ukunikela umhlatshelo wokutshiswa, wathi kubalindi lezikhulu zebutho, “Ngenani liyebabulala; kungabikho loyedwa ozaphunyuka.” Ngakho babatshaya ngenkemba bababhubhisa. Abalindi lezikhulu balahlela phandle izidumbu basebengena ethempelini likaBhali elingaphakathi. 26Bakhipha ilitshe elikhonzwayo likaBhali balitshisa.

27Balidiliza lelolitshe likaBhali elikhonzwayo babhidliza lethempeli lakhe, balenza laba yindlu yokuyela ngaphandle kuze kube lalamuhla lokhu.

28Ngalokho uJehu wadiliza ukholo lukaBhali ko-Israyeli. 29Kodwa, yena katshiyananga lezono zikaJerobhowami indodana kaNabothi, lezo ayebangele u-Israyeli ukuzenza, ukukhonza amathole egolide eBhetheli laseDani.

30UJehova wathi kuJehu, “Njengoba wenze kuhle ngokuphelelisa lokho okufaneleyo phambi kwami njalo wenze konke ebengikumisele abendlu ka-Ahabi, abendlu yakho bazabusa ko-Israyeli kuze kube yisizukulwana sesine.” 31Kodwa uJehu kazange ananzelele ukugcina umthetho kaJehova ka-Israyeli ngenhliziyo yakhe yonke. Kazange atshiyane lezono ezazisenziwa nguJerobhowami, lezo ayebangele u-Israyeli ukuba azenze. 32Ngalezozinsuku uJehova waqalisa ukwehlisa inani labako-Israyeli. UHazayeli wanqoba ama-Israyeli kulo lonke ilizwe lawo, 33empumalanga yeJodani kulo lonke eleGileyadi (kuthatha ummango ka-Gadi, oka-Rubheni lokaManase), kusukela e-Aroweri ngaseSihotsheni se-Arinoni kusiyaphutsha eGileyadi kungena eBhashani.

34Okunye kwezehlakalo lezenzo ngokubusa kukaJehu, konke akwenzayo, aphumelela kukho, akulotshwanga yini egwalweni lwembali yamakhosi ako-Israyeli na?

35UJehu wafa walala kuboyise emathuneni aseSamariya. UJehowahazi indodana yakhe yathatha ubukhosi yabusa. 36UJehu isikhathi abusa ngaso u-Israyeli eseSamariya kwaba yiminyaka engamatshumi amabili lafica mibili.